بعد اللي حصل لبهاء سلطان امبارح،
كتب لكم المقااال 👇
كتب بقلم ✍️
احمد حمدى مستشار علاقات دبلوماسية المجلس الإفريقي الدولى ورئيس اللجنة العليا لتنظيم الاعلام
أنا اكتشفت إن جملة «أطيب واحد في مصر» دي محتاجة تتعدل… الراجل طلع أطيب واحد في الكوكب كله
امبارح ناس كتير اتخضت لما عرفت إن بهاء سلطان اتعرض لحادث على طريق وادي النطرون في الساحل الشمالي.
عربيته دخلت في ونش واتعجنت، واتنقل المستشفى، وكان فيه اشتباه في إصابته بارتجاج في المخ، والدكاترة طلبوا منه يفضل تحت الملاحظة علشان يطمنوا إنه مفيش نزيف أو أي مضاعفات.
عمل الفحوصات والأشعات المطلوبة، وبعد كام ساعة حالته اتحسنت، واتأكدوا إنه بخير، وكمان اطمن على السواق بتاعه.
لحد هنا الموضوع ممكن يعدي عادي…
لكن اللي حصل بعد كده هو اللي خلاني أقول:
مش ازاى يا مصر بتعمليها ازاي لا إزاي يا بهاء
بهاء سأل في المستشفى:
"طب سواق الونش حصله إيه؟ هو فين دلوقتي؟"
يعني بعد كل اللي حصل، وبعد ما عربيته اتدمرت، وبعد ما دخل المستشفى…
أول واحد فكر فيه كان الراجل اللي تسبب في الحادث!
وحسب ما تم تداوله، سواق الونش كان متحفظ عليه على ذمة التحقيقات بعد الحادث.
فلما بهاء عرف، قال بمنتهى البساطة:
"أنا عايز أتنازل… الراجل ده أكيد عنده عيال، وزمانهم مخضوضين عليه."
اللي حواليه طبعًا استغربوا:
يعني إيه يا بهاء؟!
ده عرّض حياتك للخطر!
كنت ممكن تموت!
دخلت المستشفى!
وعربيتك اتدمرت!
لكن رده كان:
"المسامح كريم… طالما أنا كويس، خلاص. ربنا سترها."
وهنا الموقف يستحق نتوقف عنده شوية، مش بس من الناحية الإنسانية، لكن كمان من الناحية النفسية.
لما الإنسان يمر بلحظة يشعر فيها إن حياته كانت ممكن تنتهي، أحيانًا بيعيد ترتيب أولوياته.
الحاجات اللي كانت قبل الموقف مهمة جدًا… ممكن فجأة تصغر في عينه.
العربية تتصلح…
الفلوس تتعوض…
لكن الحياة نفسها لو راحت، مفيش رجوع.
وده ممكن يفسر جزء من رد الفعل اللي ظهر منه: بدل ما يفضل مركز على الخسارة والغضب والانتقام، ركّز على إنه هو بخير، وإن الشخص التاني كمان عنده بيت وعيال ممكن يكونوا مستنيينه.
ومن منظور نفسي، ده مثال مهم على تنظيم الانفعال وإعادة تقييم الموقف.
يعني الإنسان مايسيبش الغضب والخوف اللي حصلوا له هما اللي ياخدوا القرار، لكن يقدر يهدى، ويشوف الصورة بشكل أوسع، وبعدها يختار رد فعله.
بس هنا لازم نفرق بين حاجة مهمة جدًا:
التسامح مش معناه إن الخطأ صح.
والعفو مش معناه إنك تلغي حقوقك.
التسامح الصحي قرار واعي، مش ضعف ولا عجز.
إنما إنك تكون قادر تاخد حقك، ومع ذلك تختار العفو والتجاوز، فدي حاجة مختلفة تمامًا.
وده يخلينا نفهم معنى الاية :
﴿وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ﴾
العفو عند المقدرة…
مش إنك تسامح لأنك مش قادر تعمل حاجة.
لكن إنك تكون قادر ترد، وقادر تتمسك بحقك، ومع ذلك تختار التسامح لما يكون مناسبًا.
وفي النهاية، بعيدًا عن تفاصيل المسؤولية القانونية اللي التحقيقات هي اللي بتحسمها، لو الرواية المتداولة عن موقف بهاء صحيحة، فالمشهد نفسه يستحق الاحترام.
الراجل خرج من حادثة كان ممكن يخسر فيها حياته، وأول حاجة فكر فيها كانت حياة واحد تاني.
بس عندي سؤال واحد يا بهاء:
إنت بتعملها إزاي؟!
إحنا فيه ناس ممكن العربية لما تتخبط تقعد أسبوع بتشتم في اللي خبطها…
إنت العربية اتعجنت، وروحت تسأل على الراجل وتقول عايز أتنازل
تعليقات
إرسال تعليق